Bugun.tv xəbər verir ki, ABŞ Prezidenti Donald Tramp NATO-nun Ankarada keçirilən 36-cı Dövlət və Hökumət Başçıları Zirvəsinin yekununda təşkil etdiyi mətbuat konfransında Türkiyə Prezidenti Rəcəb Tayyib Ərdoğana və zirvənin təşkilinə yüksək qiymət verib.
Tramp bildirib ki, Ankara NATO Zirvəsinə uğurla ev sahibliyi edib və bu nəticədə Prezident Ərdoğanın böyük rolu olub. ABŞ lideri Ərdoğanı uzun illərdir dostu adlandıraraq, onu güclü lider və güclü xarakterə malik siyasətçi kimi xarakterizə edib. O, Türkiyənin hərbi baxımdan NATO-nun ən güclü ikinci ölkəsi olduğunu vurğulayıb.
ABŞ Prezidenti F-35 qırıcılarının Türkiyəyə verilməsi məsələsinin də Ərdoğanla müzakirə olunduğunu bildirib. Onun sözlərinə görə, bu məsələ ilə bağlı yekun qərarın verilməsi qarşıdakı dövrdə nəzərdən keçiriləcək.
Tramp çıxışında NATO sammitini “çox uğurlu” adlandıraraq, toplantıda müttəfiqlər arasında yüksək birlik ruhunun müşahidə olunduğunu qeyd edib. O, bütün NATO ölkələrini müdafiə xərclərini daha sürətlə artırmağa çağırıb və ABŞ-ın alyansa ən çox maliyyə töhfəsi verən ölkə olduğunu xatırladıb.
İranla bağlı sualları cavablandıran Tramp iki ölkə arasında yenidən genişmiqyaslı müharibənin başlayacağına inanmadığını bildirib. Onun sözlərinə görə, Vaşinqton cavab tədbirləri görmək iqtidarındadır və mümkün gərginliyin uzun sürəcəyini gözləmir.
ABŞ lideri əlavə edib ki, İran rəhbərliyi yeni razılaşma əldə etmək istəsə də, bunun necə həyata keçiriləcəyini özü də tam müəyyənləşdirə bilmir. O, İranın nüvə silahına sahib olmasına imkan verilməyəcəyini bir daha vurğulayıb.
Mənbə: Trt.haber