ABŞ və İran arasında son günlər yenidən artan gərginlik dünya enerji bazarlarında narahatlığı artırıb.
Bugun.tv xəbər verir ki, hərbi risklərin yüksəlməsi fonunda beynəlxalq bazarlarda neft qiymətləri bahalaşmağa başlayıb.
Reuters-in məlumatına görə, investorlar Yaxın Şərqdə vəziyyətin daha da gərginləşə biləcəyi ehtimalını qiymətləndirərək neft alışlarını artırıblar. Xüsusilə Hörmüz boğazında mümkün təhlükələr və bölgədə enerji infrastrukturuna yönələ biləcək risklər bazarlarda qiymətlərin yüksəlməsinə təsir göstərib.
Analitiklərin fikrincə, ABŞ və İran arasında qarşıdurmanın dərinləşməsi neft tədarükü ilə bağlı narahatlıqları gücləndirir. Bu isə yalnız enerji bazarına deyil, həm də qlobal inflyasiya və daşınma xərclərinə təsir göstərə bilər.
Mütəxəssislər bildirirlər ki, bazarlar hazırda siyasi və hərbi hadisələrə son dərəcə həssas reaksiya verir. Əgər bölgədə vəziyyət sabitləşməzsə və ya enerji marşrutlarına təhlükə yaranarsa, neft qiymətlərində artımın davam etməsi mümkündür.
İqtisadçılar hesab edirlər ki, enerji qiymətlərindəki dəyişikliklər yaxın həftələrdə dünya maliyyə bazarlarının əsas gündəm mövzularından biri olaraq qalacaq.
Mənbə: Reuters