Türkiyənin paytaxtı Ankarada NATO-nun Dövlət və Hökumət Başçılarının sammiti öz işinə başlayıb. Sammitdə əsas müzakirə mövzularından biri alyans ölkələrinin müdafiə xərclərinin artırılması olacaq.
Bugun.tv xəbər verir ki, NATO-nun Baş katibi Mark Rütte sammit öncəsi çıxışında alyansın daha güclü müdafiə sənayesinə və hərbi istehsal imkanlarına ehtiyac duyduğunu bildirib. Onun sözlərinə görə, Rusiya, Çin və Şimali Koreya arasında əməkdaşlığın genişlənməsi NATO üçün yeni təhlükəsizlik çağırışları yaradır.
ABŞ Prezidenti Donald Tramp isə müttəfiq ölkələrin müdafiə xərclərini artırmasının vacibliyini bir daha gündəmə gətirib. O, NATO üzvlərinin kollektiv müdafiəyə daha çox maliyyə ayırmalı olduqlarını vurğulayıb.
Sammit çərçivəsində Ukrayna Prezidenti Volodimir Zelenskinin ABŞ Prezidenti Donald Trampla görüşü də gözlənilir. Zelenski Ankarada keçiriləcək ikitərəfli görüşlərdə Ukraynaya yeni hərbi yardım, pilotsuz uçuş aparatları və hava hücumundan müdafiə sistemləri ilə bağlı razılaşmalar əldə etməyə çalışacaq.
Sammit zamanı NATO-nun müdafiə sənayesinin genişləndirilməsi, hərbi istehsalın artırılması və alyans ölkələri arasında əməkdaşlığın gücləndirilməsi də əsas gündəm mövzuları sırasında yer alır.
Mənbə: The Guardian