Bugun.tv xəbər verir ki, ABŞ Prezidenti Donald Tramp süni intellektin yaratdığı təhlükələrin idarə oluna biləcəyini və bu sahədə müəyyən qoruyucu qaydaların tətbiqinə qarşı olmadığını bildirib.
Reuters agentliyinin məlumatına görə, Tramp CBS telekanalının “60 Minutes” proqramına müsahibəsində süni intellektin təhlükəsizliyi ilə bağlı Demokratlarla əməkdaşlıq etməyə hazır olduğunu da ifadə edib.
Jurnalistin ABŞ-ın Çinlə texnologiya yarışında öndə qalmaq üçün süni intellektin yaratdığı riskləri qəbul edib-etməməli olduğu barədə sualına cavab verən Tramp təhlükələrin idarə edilə biləcəyini deyib.
“Qoruyucu qaydaların əleyhinə deyiləm”, – deyə ABŞ prezidenti bildirib. Bununla yanaşı, o, tətbiq olunacaq məhdudiyyətlərin ABŞ-ı Çinlə müqayisədə xeyli geridə qoymasını istəmədiyini vurğulayıb. Tramp Çində bu cür məhdudiyyətlərin olmadığını iddia edib.
Reuters qeyd edir ki, Tramp daha əvvəl geniş dövlət tənzimləmələri əvəzinə texnologiya şirkətlərinin öz fəaliyyətlərinə nəzarət etməsinə üstünlük verib. Onun son açıqlaması müəyyən təhlükəsizlik qaydalarına münasibətdə daha açıq mövqe nümayiş etdirdiyini göstərsə də, bu qaydaların hansı səviyyədə olacağı hələ məlum deyil.
Mənbə: Reuters