ABŞ Prezidenti Donald Tramp ilə Ukrayna Prezidenti Volodimir Zelenski görüşü baş tutub.
İki rəhbər Florida, Mar-a-Lagoda görüşərək Rusiya-Ukrayna müharibəsinin həlli istiqamətində sülh planını müzakirə ediblər. Görüş zamanı tərəflər hazırda hazırlanmaqda olan 20 maddəli sülh təklifini müzakirə edib və Tramp bu sənədin “son mərhələyə yaxın” olduğunu bildirib. Danışıqlar iki ölkə arasında davam edən diplomatik təmasların ən mühüm addımlarından biri hesab olunur.
Tramp görüşdən sonra verdiyi açıqlamada, münaqişənin həlli üçün hələ də çətin məsələlərin qaldığını etiraf edib, xüsusilə Donbas bölgəsinin statusu və Ukraynanın təhlükəsizlik zəmanətləri mövzusunda fikir ayrılıqları olduğunu vurğulayıb. O, həmçinin Rusiyanın bu təkliflərə nə dərəcədə cavab verəcəyinin hələ aydın olmadığını da bildirib.
Zelenski isə görüşün “konstruktiv” keçdiyini deyərək, sülh planının əsas elementləri üzrə razılığın yaxın olduğunu bildirib. ABŞ-ın Ukraynaya dəstəyinin əhəmiyyətini də qeyd edib.
Daha sonra tərəflər danışıqları davam etdirmək və yaxın gələcəkdə növbəti addımları müəyyənləşdirmək qərarına gəliblər.
Mənbə: The Guardian