ABŞ Prezidenti Donald Trampın fəaliyyətinə ictimai dəstək son dövrün ən aşağı səviyyələrindən birinə enib. CNN və SSRS tərəfindən keçirilən yeni sorğuya əsasən, respondentlərin cəmi 34 faizi Trampın fəaliyyətini bəyəndiyini bildirib, 66 faizi isə onun işini dəstəkləmədiyini qeyd edib. Bu göstərici Trampın ikinci prezidentlik dövründə qeydə alınan ən aşağı reytinqlərdən biri hesab olunur.
Sorğunun nəticələrinə görə, amerikalılar xüsusilə İranla bağlı hərbi siyasət, inflyasiya və yanacaq qiymətlərinin artımından narazıdırlar. İştirakçıların əksəriyyəti hesab edir ki, administrasiya ölkənin əsas problemlərinə kifayət qədər diqqət ayırmır.
Araşdırma göstərir ki, Trampın dəstəyi yalnız müstəqil və demokrat seçicilər arasında deyil, Respublikaçılar Partiyasının tərəfdarları arasında da zəifləyib. Sorğuda respondentlərin əhəmiyyətli hissəsi iqtisadi vəziyyətin və yaşayış xərclərinin pisləşdiyini bildirib.
CNN qeyd edir ki, qarşıdakı aylarda iqtisadi göstəricilər və xarici siyasətdə baş verəcək hadisələr Trampın ictimai dəstəyinin necə dəyişəcəyinə ciddi təsir göstərə bilər.
Mənbə: EconomicTimes