Bugun.tv xəbər verir ki, alimlərin yeni araşdırmasına görə, insanlar hər zaman zəhmətdən qaçmır, daha çox mənasız və nəticəsiz enerji sərf etməkdən yayınmağa çalışırlar.
Harvard University, University of Geneva və University of Poitiers alimlərinin birgə apardığı tədqiqat göstərib ki, tənbəllik çox vaxt motivasiya çatışmazlığından deyil, görülən işin faydasız görünməsindən qaynaqlanır.
Araşdırmaya görə, əgər insan gördüyü işin nəticəsinin dəyərli olacağına inanırsa, daha çox səy göstərməyə hazır olur. Alimlər bildirirlər ki, uşaqlar üzərində aparılan müşahidələr də bunu təsdiqləyir. Məsələn, körpələr böyüklərin çətin tapşırıqlar üzərində çalışdığını görəndə özləri də daha çox səy göstərirlər.
Tədqiqat müəllifləri qeyd edirlər ki, altı yaş ətrafında uşaqlar çətin bir işi uğurla başa vurduqda, asan tapşırıqdan daha çox sevinc hissi keçirirlər. Bu isə onu göstərir ki, səy göstərmək özü-özlüyündə mənfi qəbul olunmur.
Alimlərin qənaətinə görə, insanlar və heyvanlar ən asan yolu yalnız mükafat eyni olduqda seçirlər. Əgər nəticə daha dəyərlidirsə, daha çox zəhmət sərf etməyə hazır olurlar.
Mütəxəssislər həmçinin vurğulayırlar ki, dopamin səviyyəsinin azalması insanın fəaliyyətə marağını zəiflədə bilər. Belə hallarda səy göstərmək həqiqətən ağır və xoşagəlməz hiss olunur.
Araşdırma müəllifləri hesab edirlər ki, məktəbdə, iş həyatında və gündəlik fəaliyyətdə əsas məqsəd tapşırıqları yalnız asanlaşdırmaq deyil, onları insan üçün daha mənalı və məqsədli etmək olmalıdır.
Mənbə: mail.ru