Bugun.tv xəbər verir ki, məşhur amerikalı rəssam Uilyam de Kuninqin əsərləri uzun fasilədən sonra Niderlandda böyük sərgidə nümayiş etdiriləcək.
Amsterdamdakı Rijksmuseum muzeyində keçiriləcək sərgi rəssamın əsərlərinin Avropada son 40 ildən çox müddətdə təşkil olunan ən böyük nümayişi olacaq. Sərgidə 120-dən çox əsərin təqdim olunması nəzərdə tutulur.
Uilyam de Kuninq 1920-ci illərdə Niderlanddan Nyu-Yorka köçüb və sonradan XX əsrin müasir incəsənətinin ən tanınmış nümayəndələrindən birinə çevrilib. O, 1930–1940-cı illərdə Nyu-Yorkda formalaşan abstrakt ekspressionizm cərəyanının əsas nümayəndələrindən biri kimi tanınır.
Rijksmuseumda “Willem de Kooning at Work” adı ilə keçiriləcək sərgi oktyabrın 9-da başlayacaq və 2027-ci il yanvarın 17-dək davam edəcək.
Sərgi rəssamın yaradıcılığının müxtəlif dövrlərini əhatə edəcək. Əsərlərin böyük hissəsini rəsmlər və kağız üzərində çəkilmiş işlər təşkil edir.
Mənbə: Euronews