United Airlines-a məxsus Denverdən Los-Ancelesə uçan təyyarənin sərnişinləri dəhşətli anlar yaşayıb. Təyyarə 36.000 fut yüksəklikdə olarkən naməlum obyekt ön şüşəyə dəyib. Zərbə pilotların kabinəsinin pəncərəsini sındırıb və pilotlardan biri qolundan xəsarət alıb.
Pilot sərnişinlərə “Təyyarəmizə meteor düşüb” deyə anons edib. Uçuş heyəti dərhal fövqəladə prosedurları işə salıb və təyyarəni Solt Leyk Siti hava limanına yönləndirib. Təxminən 15 dəqiqəlik gərgin gözləmədən sonra təyyarə təhlükəsiz yerə eniş edib.
Enişdən sonra hadisə yerinə Milli Nəqliyyat Təhlükəsizliyi Şurasının (NTSB) qrupları göndərilib. Mütəxəssislər müəyyən ediblər ki, zərbə pəncərənin yuxarı sağ tərəfində yüksək qüvvə ilə baş verib və metal çərçivənin xeyli deformasiyasına səbəb olub.
NTSB radar məlumatlarını, uçuş yazıcısını (qara qutu) və hava hesabatlarını nəzərdən keçirdi. Təyyarənin ön şüşəsi də ətraflı müayinə üçün laboratoriyaya göndərilib.
Hadisədən sonra ABŞ-da yerləşən WindBorne Systems hava proqnozu şirkəti toqquşmaya səbəb olan obyektin onun tədqiqat balonlarından biri olduğunu açıqlayıb.
Şirkətin həmtəsisçisi Kai Marshland verdiyi açıqlamada “Bu hadisədə sözügedən şarın bizim olduğuna inanırıq” deyib.
WindBorne Systems süni intellektə əsaslanan hava proqnozu modellərini hazırlayır və atmosfer məlumatlarını toplamaq üçün təxminən 1,2 kiloqram ağırlığında olan şarlardan istifadə edir. Şirkət öz internet saytında verdiyi açıqlamada balonlarının hava trafiki üçün risk yaratmadığını iddia edib.
ABŞ Federal Aviasiya Administrasiyası (FAA) daha əvvəl bildirmişdi ki, kosmos zibilləri və ya yüksək hündürlükdə olan şarların kommersiya təyyarələri ilə toqquşması ehtimalı “trilyonda birdir”. Lakin son hadisə bir daha təsdiq etdi ki, bu riski tamamilə istisna etmək olmaz.
NTSB araşdırmasının nəticələrini ictimaiyyətlə bölüşəcəyini açıqlayıb.
Mənbə: İlkha