Bugun.tv xəbər verir ki, İtaliyada tikinti sektorunda diqqətçəkən yenilik həyata keçirilib. Beton, dəmir və kərpicdən istifadə edilmədən, tamamilə yerli xam torpaqdan 3D printer texnologiyası vasitəsilə inşa edilən ilk ekoloji ev modeli “TECLA” böyük maraq doğurub.
Layihə İtaliyanın Mario Cucinella Architects memarlıq studiyası ilə WASP şirkətinin birgə əməkdaşlığı nəticəsində hazırlanıb.
Tikintidə istifadə olunan əsas material isə birbaşa inşaat sahəsindən əldə edilən təbii torpaq və gil qarışığı olub. Mütəxəssislər bildirirlər ki, bu üsul həm ekoloji baxımdan daha təhlükəsizdir, həm də tikinti xərclərini azaltmağa imkan yaradır.
Evin tikintisi üçün eyni anda işləyən iki böyük 3D printerdən istifadə olunub. “TECLA” layihəsində, mürəkkəb palçıq yuvaları quran vəhşi arılardan ilham alınaraq hazırlanan Crane WASP adlı nəhəng çoxfunksiyalı printer qolları tətbiq edilib.
Sistem xüsusi gil qarışığını qat-qat yerləşdirərək divarları formalaşdırıb. Dairəvi xətlərə malik futuristik dizaynı ilə seçilən ev müasir memarlıq nümunəsi kimi qiymətləndirilir.
Mütəxəssislərin fikrincə, bu texnologiya gələcəkdə ənənəvi tikinti üsullarına alternativ ola bilər və xüsusilə ekoloji yaşayış layihələrində geniş istifadə edilə bilər.
Mənbə: EnSonHaber