Bugun.tv xəbər verir ki, gün ərzində uzun müddət fasiləsiz oturmaq xərçəng xəstəliyinə tutulma və xərçəngdən ölüm riskinin artması ilə əlaqələndirilir.
Qlazqo Universitetinin alimlərinin apardığı yeni araşdırmada Böyük Britaniyanın “Biobank” layihəsində iştirak edən 91 mindən çox insanın məlumatları araşdırılıb. İştirakçıların orta yaşı 56 olub və onların əvvəllər xərçəng diaqnozu almadığı bildirilib.
Tədqiqat zamanı iştirakçılar yeddi gün ərzində biləklərində hərəkəti ölçən xüsusi cihaz daşıyıblar. Daha sonra onların sağlamlıq vəziyyəti təxminən 12 il ərzində izlənilib.
Alimlər oturaq vaxtı iki formada qiymətləndiriblər. Birinci qrupda 30 dəqiqədən çox davam edən fasiləsiz oturma müddətləri, ikinci qrupda isə qısa hərəkətlərlə bölünən oturma vaxtları nəzərə alınıb.
Nəticələrə görə, fasiləsiz oturma müddətinə əlavə olunan hər bir saat xərçəngdən ölüm riskini 9 faiz, ümumi xərçəng riskini isə 3 faiz artırıb. Piylənmə və 2-ci tip şəkərli diabetlə əlaqəli xərçənglərdə risk artımı daha yüksək olub.
Bunun əksinə, oturma müddətini qısa hərəkətlərlə bölən insanlarda riskin daha aşağı olduğu müəyyənləşdirilib. Araşdırmaya əsasən, fasiləli oturmanın hər əlavə saatı xərçəngdən ölüm riskinin 18 faiz, ümumi xərçəng riskinin isə 6 faiz azalması ilə əlaqələndirilib.
Tədqiqatçılar həmçinin gündə bir saat fasiləsiz oturma müddətinin yüngül fiziki fəaliyyətlə əvəz olunmasının xərçəngdən ölüm riskini 12 faiz azalda biləcəyini hesablayıblar. Yavaş gəzmək və ev işləri görmək kimi sadə hərəkətlərin də faydalı ola biləcəyi bildirilir.
Qlazqo Universitetinin epidemioloqu Frederik Ho bildirib ki, 30 dəqiqədən artıq fasiləsiz oturmaq xüsusilə diqqət çəkir və hətta qısa gəzintilər də qoruyucu rol oynaya bilər.
Bununla belə, alimlər araşdırmanın müşahidə xarakterli olduğunu vurğulayırlar. Buna görə nəticələr oturmağın birbaşa xərçəngə səbəb olduğunu sübut etmir. Tədqiqat yalnız uzunmüddətli hərəkətsizliklə xərçəng riski arasında əlaqə olduğunu göstərir.
Mənbə: Trt.haber