Bugun.tv olaraq hər zaman Azərbaycanın müxtəlif idman növləri üzrə məşqçilərinin tanıdılmasına şərait yaradırıq. “Onları siz də tanıyın” rubrikasının qonağı bu dəfə Çin Döyüş Növləri Assosiasiyasının nəzdində fəaliyyət göstərən Azərbaycan Vinq Çun Federasiyasının baş məşqçisi, Dünya və Avropa çempionu, “Real” Vinq Çun İdman Klubunun rəhbəri Arzuman Rəsulzadədir.
Onu yaxından tanıyaq:
“Mən Arzuman Rəsulzadə. Vinq Çun Federasiyasının baş məşqçisi, “Real” Vinq Çun İdman Klubunun rəhbəriyəm. Bu döyüş sənəti ilə tanışlığım 2010-cu ilə təsadüf edir. Ondan əvvəl ki, illərdə digər idman növləri ilə məşğul olmuşam. 2011-2012-ci illərdən Vinq Çun döyüş sənəti üzrə dəfələrlə Respublika çempionu adına layiq görülmüşəm. 2017-ci ildə Avropa çempionu, 2019-cu ildə Foşanda keçirilən Dünya çempionatında gümüş mükafatcı olmuşam”.
“2014-cü ildən etibarən, Vinq Çun döyüş sənəti üzrə məşqçi kimi fəaliyyət göstərirəm. Bu illər ərzində də uğurlarım çox olub. Eyni zamanda, tələbələrim arasında da Dünya və Avropa çempionları var. Onlardan İsmayıl Sayadlını, Muradəli Əliyevi, Camal Əliyevi, Yusif Əlizadəni, Əlif Məmmədovu və digərlərinin adlarını sadalaya bilərəm. 2023-cü ildə də gözəl nəticələrimiz oldu. Klubumuzun 2 idmançısı İsmayıl Sayadlı və Ayman Mahalov Honkonqda keçirilən Dünya çempionatının birincisi oldular”.
“Hazırda bizim “Real” Vinq Çun İdman Klubunun 50-dən çox üzvü var. Klubumuzda 10-12 qız var. Oğlanlarımızın sayı daha çoxdur. Onların arasında 5 yaşında olan da var, 45 yaşında olan da… Hər kəs bu idman növünə böyük maraq, həvəs və sevgi ilə gəlir. Burada onlara özünümüdafiəni öyrədir, özünə güvən hissini aşılayırıq”.
“2024-cü ildə də bizi yarışlar, Avropa və Dünya çempionatları gözləyir. Mən yarışlara bu döyüş növü üzrə həm idmançı, həm də məşqçi kimi qatılıram. Valideynlərə tövsiyə edərdim ki, uşaqlarının idmanla məşğul olmasına şərait yaratsınlar. Fərqi yoxdur, istər Vinq Çun döyüş sənəti olsun, istərsə də digərləri… Əsas odur ki, fəlsəfi döyüş növləri ilə məşğu olsunlar, Azərbaycanı dünyada tanıtsınlar”.
Bugun.tv olaraq, Vinq Çun Federasiyasının baş məşqçisi Arzuman Rəsulzadəyə və onun tələbələrinə gələcək karyeralarında yüksək nailiyyətlər diləyirik!
Müxbir: Rəşad Bayramov, Operator: Samir Əliyev