Bugun.tv xəbər verir ki, iqtisadçı millət vəkili Vüqar Bayramov minimum əmək haqqının artırılması ilə bağlı sosial media hesabında paylaşım edib.
Deputat bildirib ki, “Əmək Məcəlləsinə” edilən dəyişikliklərə əsasən minimum əməkhaqqı məbləğinə ildə ən azı bir dəfə baxılmalıdır və bu, maaş artımlarında dövriliyin təmin olunması deməkdir.
Vüqar Bayramov qeyd edib ki, minimum əmək haqqının artırılması yalnız aşağı maaş alanlara deyil, vahid tarif cədvəli üzrə çalışan digər işçilərə də şamil olunur. Onun sözlərinə görə, dövlət büdcəsindən maliyyələşdirilən sahələrdə çalışan işçilərin maaşları minimum əməkhaqqı artırıldıqdan sonra yeni məbləğə uyğunlaşdırılır.
Deputat vurğulayıb ki, hazırda vahid tarif cədvəli üzrə ən aşağı maaş 400, ən yüksək maaş isə 1150 manatdır. Minimum əməkhaqqının artırılması nəticəsində təxminən 700 min vətəndaşın maaşında artım baş verə bilər.
Vüqar Bayramov əlavə edib ki, qanunvericiliyə edilən dəyişikliklər İlham Əliyev tərəfindən 23 fevral 2026-cı ildə təsdiqlənib. Buna görə də həmin tarixdən sonrakı bir il ərzində minimum əmək haqqına ən azı bir dəfə baxılaraq artırılması gözlənilir.