Bugun.tv xəbər verir ki, Milli Məclisin deputatı, iqtisadçı Vüqar Bayramov 22 İyul – Milli Mətbuat Günü münasibətilə sosial media hesabında paylaşım edib. O, Azərbaycan milli mətbuatının yaranmasının 151-ci ildönümü münasibətilə bütün jurnalistləri təbrik edərək peşə fəaliyyətlərində uğurlar arzulayıb.
Deputat qeyd edib ki, Ümummilli Lider Heydər Əliyev milli mətbuatın inkişaf mərhələlərini Azərbaycan xalqının azadlıq və müstəqillik uğrunda mübarizə tarixinin ayrılmaz hissəsi kimi qiymətləndirib. O, Prezident İlham Əliyevin mətbuatın qərəzsiz, çevik və operativ fəaliyyət göstərməsinin, cəmiyyətin dolğun məlumatlandırılmasının vacibliyi ilə bağlı fikirlərini də xatırladıb.
Vüqar Bayramov bildirib ki, qlobal media bazarında rəqəmsal platformaların rolu ildən-ilə artır. Onun sözlərinə görə, rəqəmsal media və internet xidmətləri hazırda 1,05 trilyon dollardan çox bazar dəyərinə malikdir və dünya üzrə reklam investisiyalarının 72,7 faizini cəlb edir. Proqnozlara əsasən, 2030-cu ilə qədər rəqəmsal media ümumi media sənayesi gəlirlərinin 52 faizdən çoxunu təşkil edəcək.
Deputatın paylaşımında Azərbaycanda reklam bazarının həcminin təxminən 281 milyon dollar olduğu, ölkədə 12,3 milyon mobil bağlantının və 7,61 milyon sosial media istifadəçisinin mövcud olduğu da vurğulanıb. Bildirilib ki, 2025-ci ildə sosial media istifadəçilərinin sayı əvvəlki illə müqayisədə 1,2 milyon nəfər və ya 19,2 faiz artıb.
Vüqar Bayramov sonda qeyd edib ki, rəqəmsal medianın inkişafı yeni imkanlar və çağırışlar yaratsa da, bütün dövrlərdə peşəkar və qərəzsiz jurnalistika mətbuatın inkişafında əsas hərəkətverici qüvvə olaraq qalır.