Bugun.tv xəbər verir ki, Vyana şəhərində ATƏT-in Şimali Makedoniya Sədrliyi ilə Demokratik Təsisatlar və İnsan Hüquqları Bürosu tərəfindən “Media plüralizmi hərtərəfli təhlükəsizliyin əsas təməllərindən biri kimi” mövzusunda insan ölçüsü üzrə birinci əlavə toplantısı keçirilib.
Bu barədə Bugun.tv-yə hüquq müdafiəçisi Əhməd Şahidov məlumat verib. Toplantıda ATƏT-in üzvü olan 57 ölkə, Əməkdaşlıq üzrə ATƏT tərəfdaşları, ATƏT-in müxtəlif strukturları, vətəndaş cəmiyyəti institutları, beynəlxalq təşkilatlar və digər müvafiq şəxslər iştirak ediblər.
Toplantıda “Media azadlığı olmadan hərtərəfli təhlükəsizlik niyə ola bilməz?”, “Media azadlığının ATƏT-in üç ölçüsünə təsiri” və “Media plüralizmi demokratiyanın əsas təməllərindən biri kimi” mövzularda müzakirələr aparılıb.
Tədbirdə yaxından iştirak edən Azərbaycan Respublikasının Medianın İnkişafı Agentliyinin nümayəndə heyətinin üzvləri media azadlığının insan hüquq və azadlıqları, həmçinin qlobal təhlükəsizliyin qorunmasında, ədalətli və sülhsevər cəmiyyətlərin təşviqində mühüm rol oynadığını qeyd ediblər. Müasir dövrün təhlükəsizlik çağırışlarının müxtəlif aspektlərinə toxunulub, münaqişə zamanı gərginliyin azaldılması və sülhün təşviqində medianın mühüm rol oynamaq imkanının olduğu, lakin etibarlılığın təmin edilməsi üçün medianın dəqiqlik, şəffaflıq və qərəzsizlik prinsiplərinə riayət etməsinin vacibliyi vurğulanıb.