Bugun.tv xəbər verir ki, Azərbaycan Prezidenti İlham Əliyevin təşəbbüsü ilə Ümumdünya Şəhərsalma Forumunun (WUF13) tarixində ilk dəfə Liderlər Sammiti təşkil olunub.
Mayın 18-də keçirilən sammit qlobal şəhərsalma siyasətinin formalaşdırılması baxımından mühüm beynəlxalq platforma kimi qiymətləndirilib. Tədbirdə şəhərlərin transformasiyası, urban dayanıqlılıq, iqlim dəyişikliklərinə adaptasiya və inklüziv şəhər planlaşdırılması kimi aktual mövzular müzakirə olunub.
Sammitdə 27 dövlət və hökumət başçısı, beynəlxalq təşkilatların rəhbərləri və BMT sisteminə daxil olan qurumların yüksək səviyyəli nümayəndələri iştirak ediblər. İştirakçıların yüksək təmsilçiliyi tədbirin qlobal əhəmiyyətini bir daha nümayiş etdirib.
Çıxış edən liderlər sürətli urbanizasiya şəraitində şəhərlərin qarşılaşdığı əsas problemlərə — mənzil təminatı, infrastrukturun dayanıqlılığı, ekoloji balans və sosial inklüzivlik məsələlərinə diqqət çəkiblər. Eyni zamanda, innovativ texnologiyaların tətbiqi, rəqəmsal idarəetmə və yaşıl iqtisadiyyata keçidin vacibliyi vurğulanıb.
Tədbir çərçivəsində Azərbaycanın ev sahibliyi yüksək qiymətləndirilib. İştirakçılar göstərilən qonaqpərvərliyə görə təşəkkürlərini bildirərək, WUF13-ün təşkilati baxımdan uğurla həyata keçirildiyini qeyd ediblər.
Sammitin yekununda şəhərsalma sahəsində beynəlxalq əməkdaşlığın genişləndirilməsi, təcrübə mübadiləsinin artırılması və BMT platformaları çərçivəsində birgə təşəbbüslərin gücləndirilməsi istiqamətində ümumi razılıq əldə olunub.
Məhluqə Qaramanlı — “Əlil Qadınlar Cəmiyyəti” ictimai birliyinin sədri 