Bugun.tv xəbər verir ki, İraqda yanacaq qıtlığı yenidən ciddi problemə çevrilib. Paytaxt Bağdadın müxtəlif ərazilərində fəaliyyətini davam etdirən yanacaqdoldurma məntəqələrinin qarşısında uzun avtomobil növbələri yaranıb.
Yanacaq tapmaqda çətinlik çəkən vətəndaşlar benzin əldə etmək üçün saatlarla bir neçə məntəqəni gəzməli olduqlarını bildiriblər. Sürücülər yaranmış vəziyyətin gündəlik həyata, xüsusilə taksi xidmətlərinə mənfi təsir göstərdiyini deyirlər.
İraqlı Ebu Əhməd problemin qəfil yarandığını bildirib. Onun sözlərinə görə, ölkədə müharibə olmadığı halda belə yanacaq böhranının yenidən meydana çıxması insanlarda narahatlıq yaradıb. O, benzin axtarmaq üçün saatlarla yollarda qaldığını və hətta cümə namazına gedə bilmədiyini söyləyib.
Taksi sürücüsü Ziyad Abdullah isə təxminən iki saat Bağdadı gəzdiyini, sonda isə uzun növbənin olduğu bir məntəqədə benzin tapa bildiyini deyib.
İraq Neft Nazirliyi yanacaqdoldurma məntəqələrində yaranan sıxlığın istehsal və istehlak arasındakı fərqlə əlaqəli olduğunu bildirib. Nazirlik çatışmazlığın aradan qaldırılması və strateji ehtiyatların gücləndirilməsi üçün tədbirlər görüldüyünü açıqlayıb.
ABŞ-İran müharibəsi fonunda İraqın enerji infrastrukturu və yanacaq təchizatı ilə bağlı problemlər son aylarda bir neçə dəfə gündəmə gəlib. AP daha əvvəl ölkənin şimalında uzunmüddətli yanacaq növbələrinin yarandığını və bəzi yanacaqdoldurma məntəqələrinin fəaliyyətini dayandırdığını yazmışdı.
İraq dünyanın ən böyük neft hasilatçıları və ixracatçıları sırasında yer alsa da, ölkədə emal və daxili yanacaq təchizatı ilə bağlı problemlər vaxtaşırı böhran yaradır. Reuters-in məlumatına görə, İraqın neft ixracı avqust ayında iyul ayı ilə müqayisədə əhəmiyyətli dərəcədə artaraq gündəlik təxminən 2,34 milyon barrelə çatıb.
Mənbə: EnSonHaber