Yunanıstanın baş naziri Kiriakos Mitsotakis Larisa şəhərində baş vermiş qatar qəzasında həlak olan 57 nəfərin ailələrindən bağışlanmasını istəyib.
Bugun.tv xəbər verir ki, fevralın 28-də baş vermiş qəzaya görə paytaxt Afinada minlərlə insan nümayişə qoşulub. Aksiyada 12 min nəfər iştirak edib. Etirazçılarla polis arasında toqquşmaların baş verdiyi bildirilir.
Bəzi nümayişçilər zibil qutularını yandırıblar. Onlar ölənlərin xatirəsinə səmaya yüzlərlə qara şar buraxıblar. Bəziləri isə əllərində “Qatil hökumətlərə lənət olsun!” yazılan lövhələr tutublar. 
Qeyd edək ki, hadisə ilə bağlı 59 yaşlı stansiya rəisi ehtiyatsızlıqdan adam öldürməkdə ittiham olunub. Vəkili Stefanos Pantsartzidis bildirib ki, o, qəzaya görə məsuliyyət daşıdığını etiraf edib.
Qeyd edək ki, hadisə ilə bağlı nəqliyyat naziri Kostas Karamanlis də ölən insanlara hörmət əlaməti olaraq istefa verib. Qəzadan dərhal sonra Yunanıstan hökuməti üç günlük milli matəm elan etdi. Qurbanların dəfn xərclərinin dövlət büdcəsindən ödəniləcəyini söylədi.
Mənbə: BBC