Braziliyada yaşı 100-ü keçən üç bacının uzunömürlülüyünün sirri alimlər tərəfindən araşdırılır. Tədqiqatçılar hesab edirlər ki, onların genetik xüsusiyyətləri sağlam qocalmanın səbəblərini anlamağa kömək edə bilər.
Bugun.tv xəbər verir ki, 109 yaşlı Levita de Deus Nunes, 104 yaşlı Zoraide de Deus Mota və 103 yaşlı Zulina de Deus Nunes bu ay Guinness Dünya Rekordları tərəfindən dünyanın yaşayan ən yaşlı üç bacısı kimi tanınıblar. Onların ümumi yaşı 316-dır.
Araşdırma São Paulo Universiteti nəzdində həyata keçirilən DNA Longevo layihəsi çərçivəsində aparılır. Alimlər bacıların DNT nümunələrini analiz edərək ürək, beyin və əzələlərin yaşlanmaya qarşı davamlı qalmasına kömək edən genləri müəyyən etməyə çalışırlar.
Mütəxəssislərin sözlərinə görə, bir ailədə bir neçə nəfərin 100 yaşdan çox yaşaması güclü genetik amillərin mövcudluğuna işarə edir. Bununla yanaşı, bacıların sağlam qidalanması, aktiv həyat tərzi və güclü ailə bağlarının da uzunömürlülükdə mühüm rol oynadığı bildirilir.
Tədqiqatçılar gələcəkdə 500-dən çox yüzyaşlının genetik məlumatlarını müqayisə etməyi planlaşdırırlar. Layihənin nəticələrinin yaşlanma ilə bağlı xəstəliklərin qarşısının alınması və insanların daha sağlam ömür sürməsi istiqamətində yeni elmi məlumatlar təqdim edəcəyi gözlənilir.
Mənbə: Reuters