Bugun.tv xəbər verir ki, Qərbi Afrika ölkələrindən olan Nigeriyanın Kaduna əyalətində son vaxtlar artan təhlükəsizlik problemləri səbəbindən 40-dan çox məktəbdə təhsil dayandırılıb.
Kaduna Təhsil üzrə Dövlət Katibi İbrahim Bulus yerli mətbuata verdiyi açıqlamada bölgədə, xüsusən də məktəblərdə baş verən son adam oğurluqları səbəbindən valideynlər və şagirdlərin qorxu içində olduğunu bildirib.
Məktəblərin müvəqqəti bağlandığını bildirən Bulus, hökumət problemli bölgələrdə təhlükəsizliyi artırarsa, gələn həftə məktəbləri yenidən aça biləcəklərini deyib.
Qeyd edək ki, bu ay Kaduna əyalətində əksəriyyəti tələbələr olmaqla 300-dən çox insan terror təşkilatları və ya silahlı qruplar tərəfindən qaçırılıb.
Nigeriyada adam oğurluğuna görə cəza ölüm olsa da, fidyə müqabilində belə cinayətlər adi hal sayılır.