Bugun.tv xəbər verir ki, Rusiyadan 40 min metrik ton dizel yanacağı daşıyan Malta bayraqlı tanker ABŞ-nin Nyu-York şəhərinə doğru hərəkət edir. Reuters-in LSEG gəmi izləmə məlumatlarına istinadən yaydığı xəbərə görə, gəminin ABŞ-yə noyabrın 7-də çatacağı gözlənilir.
Məlumata əsasən, Agioi Fanendes adlı orta ölçülü tanker oktyabrın 22-də Rusiyanın Baltik dənizi sahilində yerləşən Primorsk limanında çox aşağı kükürd tərkibli 40 min ton dizel yanacağı ilə yüklənib.
Bu daşınma Rusiya Prezidenti Vladimir Putinlə ABŞ Prezidenti Donald Tramp arasında yanacaq tədarükü ilə bağlı əldə olunan razılaşmadan sonra baş verir. Razılaşmaya əsasən, Rusiya dizel yanacağının ixracına tətbiq etdiyi öz məhdudiyyətini aradan qaldıraraq məhsulu ABŞ də daxil olmaqla dünya bazarlarına çıxarmağa razılaşıb.
Reuters-in yazdığına görə, Tramp oktyabrın 9-da Rusiyanın ilkin mərhələdə 300 min ton dizel yanacağı ixrac edəcəyini, noyabrda daha 500 min ton, bundan sonra isə əlavə 1 milyon ton göndərilməsinin nəzərdə tutulduğunu açıqlayıb.
Rusiyanın baş nazirinin müavini Aleksandr Novak ölkənin dizel yanacağı ixracını ilin sonunadək ayda 3–3,5 milyon tona çatdıra biləcəyini bildirib.
Xatırladaq ki, Avropa İttifaqının Rusiyanın neft məhsullarına qarşı tam embarqosu 2023-cü ilin fevralında qüvvəyə minib. Bundan sonra Rusiya dizel yanacağını əsasən Braziliya, Türkiyə və Afrika ölkələrinə ixrac edib.
Mənbə: Reuters