Aşağı kalorili pəhrizlərin bəzən gözlənilən nəticəni verməməsi, əksinə çəki artımına səbəb olması metabolizmlə bağlıdır.
Məlumata görə, kəskin şəkildə gündəlik kalori qəbulunun azaldılması orqanizmdə müdafiə mexanizmini işə salır. Həkim-preventoloq Yuliya Smirnova bildirib ki, bir çox insan arıqlamaq məqsədilə gündəlik qida qəbulunu 1000 kilokaloriyə qədər azaldır, lakin nəticədə daha sürətlə kökəlməyə başlayır.
Onun sözlərinə görə, hər bir insanın “bazal metabolizm” səviyyəsi var. Bu, orqanizmin normal fəaliyyətini təmin etmək üçün lazım olan minimum enerji miqdarıdır. Əgər qəbul edilən kalori bu səviyyədən aşağı düşərsə, bədən enerji çatışmazlığı ilə üzləşir və metabolizm yavaşlayır.
Bu zaman qəbul edilən qidalar daha çox yağ şəklində yığılmağa başlayır. Çünki orqanizm bunu gələcəkdə mümkün “aclıq” vəziyyətinə qarşı ehtiyat kimi saxlayır.
Mütəxəssis qeyd edir ki, düzgün yanaşma bazal metabolizm səviyyəsinə əlavə olaraq gündəlik 200–300 kilokalori qəbul etməkdir. Bununla yanaşı, qidalanmanın keyfiyyəti də vacibdir. Fastfud, şirin içkilər və zərərli qidalardan uzaq durmaq tövsiyə olunur.
Sonda vurğulanır ki, balanslı və sağlam qidalanma zamanı artıq çəki yığmaq ehtimalı xeyli azalır.
Mənbə: mail.ru