Rusiya Müdafiə Nazirliyi son 24 saat ərzində Ukrayna ərazisində enerji, nəqliyyat və liman infrastrukturuna zərbələr endirildiyini bildirib.
Nazirliyin məlumatına görə, əməliyyatlarda əməliyyat-taktiki aviasiya, hücum pilotsuz uçuş aparatları, raket qoşunları və artilleriya iştirak edib. Zərbələrin Ukrayna ordusunun istifadə etdiyi obyektlərə, uzaqmənzilli pilotsuz aparatların saxlanıldığı və buraxılışa hazırlandığı məntəqələrə, həmçinin hərbi birləşmələrin və xarici muzdluların müvəqqəti yerləşdiyi 131 əraziyə yönəldiyi qeyd olunub.
Açıqlamada həmçinin bildirilib ki, son bir gündə döyüş xətti boyunca Ukrayna ordusu təxminən 1120 hərbçi itirib. Rusiya tərəfi müxtəlif istiqamətlərdə baş verən itkilərlə bağlı detalları da açıqlayıb.
Belə ki, “Şimal”, “Qərb” və “Cənub” döyüş qruplarının məsuliyyət zonalarında yüzlərlə hərbçinin, zirehli texnikanın və digər hərbi vasitələrin məhv edildiyi iddia olunur. Eyni zamanda “Mərkəz”, “Şərq” və “Dnepr” istiqamətlərində də ciddi itkilərin olduğu vurğulanıb.
Qeyd edək ki, bu məlumatlar Rusiya Müdafiə Nazirliyi tərəfindən açıqlanıb və müstəqil mənbələr tərəfindən təsdiqlənməyib.
Mənbə: TASS