Yeni elmi araşdırma göstərib ki, həm kofeinli, həm də kofeinsiz qəhvə bağırsaq mikrobiomuna müsbət təsir göstərərək stressi azaldır və psixoloji vəziyyəti yaxşılaşdırır.
Qəhvə bitki mənşəli içkidir və onun tərkibində kofein, polifenollar, fenol turşuları və digər bioloji aktiv maddələr mövcuddur. Bu komponentlər orqanizmdə müxtəlif faydalı prosesləri stimullaşdırır.
Tədqiqat University College Cork alimləri tərəfindən aparılıb və nəticələr Nature Communications jurnalında dərc olunub. Araşdırmaya rəhbərlik edən John Cryan və komandası qəhvə istifadəsinin bağırsaq mikrobiomu ilə beyin arasındakı əlaqəyə təsirini öyrənib.
Eksperiment çərçivəsində 62 nəfər üzərində müşahidələr aparılıb. Onların bir hissəsi müntəzəm qəhvə içənlər, digərləri isə qəhvə istifadə etməyənlər olub. İştirakçılar üzərində psixoloji testlər keçirilib, həmçinin analizlər vasitəsilə mikrobiomdakı dəyişikliklər izlənilib.
Nəticələr göstərib ki, qəhvə içənlərdə stress, depressiya və impulsivlik səviyyəsi azalır. Maraqlıdır ki, bu təsir həm kofeinli, həm də kofeinsiz qəhvə üçün müşahidə olunub.
Eyni zamanda müəyyən edilib ki, kofeinsiz qəhvə öyrənmə və yaddaşı yaxşılaşdırır, kofeinli qəhvə isə diqqəti artırır və narahatlıq hissini azaldır. Alimlər hesab edir ki, bu təsirlər təkcə kofeinlə deyil, qəhvənin tərkibindəki digər maddələrlə də bağlıdır.
Araşdırma həmçinin göstərib ki, qəhvə istehlakı bağırsaqda faydalı bakteriyaların artmasına səbəb olur və bu da ümumi sağlamlığa müsbət təsir edir.
Mənbə: mail.ru