JACC: Çin mənşəli ba duan cin təcrübəsi hipertoniyaya kömək edir
Yavaş hərəkətləri, nəfəs məşqlərini və meditasiya elementlərini birləşdirən Çin təcrübəsi ba duan cin arterial təzyiqi sürətli yerimə qədər effektiv şəkildə azalda bilər. Alimlər JACC jurnalında dərc olunan genişmiqyaslı klinik tədqiqatın nəticələrinə əsasən bu qənaətə gəliblər.
Yüksək təzyiq ürək-damar xəstəlikləri üçün əsas risk faktorlarından biri hesab olunur. Həkimlər onun nəzarətdə saxlanılması üçün fiziki aktivliyi tövsiyə etsələr də, bir çox insan vaxt azlığı, avadanlıq çatışmazlığı və ya məşqlərə çıxışın olmaması səbəbindən mütəmadi idmanla məşğul ola bilmir.
Ba duan cin ardıcıl səkkiz hərəkətdən ibarət ənənəvi Çin gimnastikasıdır. O, orta səviyyəli aerob yükü, dartınma hərəkətlərini, izometrik məşqləri və şüurlu diqqət praktikalarını birləşdirir. Adətən məşq 10-15 dəqiqə davam edir və xüsusi avadanlıq tələb etmir.
Tədqiqatda sistolik təzyiqi 130-139 millimetr civə sütunu arasında olan, yaşı 40-dan yuxarı 216 nəfər iştirak edib.
İştirakçılar üç qrupa bölünüb: bir qrup ba duan cin ilə məşğul olub, digər qrup sürətli templə yeriyib, üçüncü qrup isə fiziki aktivliyi özü seçib.
Ba duan cin qrupu həftədə beş gün məşq edib. Artıq üç aydan sonra onlarda sutkalıq orta sistolik təzyiq təxminən 3 millimetr civə sütunu, həkim müayinəsi zamanı ölçülən təzyiq isə təxminən 5 millimetr civə sütunu azalıb. Effekt bir ildən sonra da qorunub saxlanılıb.
Tədqiqatçıların sözlərinə görə, belə nəticələr hipertoniyanın müalicəsində istifadə olunan bəzi birinci sıra preparatların təsiri ilə müqayisə oluna bilər.
“Təlimlərin sadəliyi, təhlükəsizliyi və uzunmüddətli dövrdə asanlıqla davam etdirilə bilməsi sayəsində ba duan cin təzyiqin azaldılması üçün effektiv və əlçatan üsula çevrilə bilər”, — deyə tədqiqatın baş müəllifi, Çinin Milli Ürək-Damar Xəstəlikləri Mərkəzinin profilaktik tibb şöbəsinin direktoru Tszin Li bildirib.
Alimlər həmçinin vurğulayıblar ki, gimnastikanın effektivliyi sürətli yerimə ilə müqayisə edilə biləcək səviyyədə olub və iştirakçılar mütəxəssislərin daimi nəzarəti olmadan belə məşq vərdişini qoruyub saxlaya biliblər.
JACC jurnalının baş redaktoru, Yel Universitetinin Tibb Məktəbinin professoru Harlan Kramxolts bildirib ki, bu tədqiqat qədim və ucuz praktikaların müasir randomizə edilmiş klinik sınaqlarda necə təsdiq oluna bildiyini nümayiş etdirir.
MƏNBƏ: mail.ru