Bugun.tv xəbər verir ki, ABŞ Prezidenti Donald Tramp İranla bağlı 14 maddədən ibarət memorandum imzalayıb.
The Guardian nəşrinin məlumatına görə, sənəd Hörmüz boğazının yenidən açılmasını, İranın nüvə fəaliyyətinə nəzarəti və Tehrana qarşı tətbiq edilən sanksiyaların mərhələli şəkildə aradan qaldırılmasını nəzərdə tutur.
Məlumata əsasən, İran Prezidenti Məsud Pezeşkian sənədi Tehranda imzalayıb, ABŞ-ın vitse-prezidenti Ceyms Devid Vensin isə iyunun 19-da Cenevrədə keçiriləcək mərasimdə sənədə imza atacağı gözlənilir.
Nəşrin yazdığına görə, memorandum İranın mülki məqsədlər üçün uranı zənginləşdirmə hüququnu tanıyır, ABŞ isə dondurulmuş İran aktivlərinin qaytarılması imkanını nəzərdən keçirir. Sənəddə həmçinin ABŞ-ın İran limanlarına tətbiq etdiyi dəniz blokadasının ləğvi, beynəlxalq sanksiyaların aradan qaldırılması və İranın yenidən qurulması üçün 300 milyard dollarlıq fond yaradılması məsələlərinin əks olunduğu bildirilir.
Tramp razılaşmanı “ABŞ üçün böyük qələbə” adlandıraraq bildirib ki, əks halda dünya iqtisadiyyatı dərin böhranla üzləşə bilərdi. İsraildə və ABŞ Respublikaçılar Partiyasının bəzi üzvləri isə memorandumun İrana həddindən artıq güzəştlər təqdim etdiyini hesab edirlər.
Fransa Prezidenti Emmanuel Makron sazişi müsbət qiymətləndirərək onun regionda sabitliyə töhfə verəcəyini bildirib.
Mənbə: The Guardian