Bugun.tv xəbər verir ki, kardioloqlar arterial təzyiqin davamlı yüksək olmasının ürək-damar sistemi üçün ciddi təhlükə yaratdığını bildiriblər.
Mayo Clinic mütəxəssislərinin məlumatına görə, hipertoniya arterial təzyiqin davamlı olaraq 130/80 mm civə sütunu və ya daha yüksək olması ilə xarakterizə olunur. Xəstəlik əksər hallarda heç bir əlamət vermədən inkişaf etdiyi üçün onu “səssiz qatil” adlandırırlar.
Həkimlər bildirirlər ki, yüksək təzyiq zaman keçdikcə damar divarlarını zədələyir. Arteriyalar elastikliyini itirir, daralır və qan dövranı çətinləşir. Nəticədə ürək daha böyük yüklə işləməli olur.
Mütəxəssislərin sözlərinə görə, uzun müddət nəzarətsiz qalan hipertoniya infarkt, insult, ürək çatışmazlığı və xroniki böyrək xəstəlikləri kimi ağır fəsadlara səbəb ola bilər. Bu dəyişikliklər orqanizmdə tədricən baş verdiyi üçün xəstəliyin erkən aşkar olunması xüsusi əhəmiyyət daşıyır.
Kardioloqlar qeyd edirlər ki, hipertoniyanın əksər hallarda nəzərə çarpan simptomları olmur. Bəzən baş ağrısı, nəfəs darlığı və ya burun qanaxması müşahidə olunsa da, insanların çoxu ağırlaşmalar yaranana qədər xəstəlikdən xəbərsiz qalır.
Həkimlər risk faktorları arasında duzun həddindən artıq qəbulu, artıq çəki, oturaq həyat tərzi, siqaret, alkoqol qəbulu, xroniki stress, yaşın artması və irsi meyilliliyi göstərirlər.
Mütəxəssislər ağır fəsadların qarşısını almaq üçün arterial təzyiqin mütəmadi ölçülməsini və hipertoniyanın erkən mərhələdə nəzarət altına alınmasını tövsiyə edirlər.
Mənbə: mail.ru