Bugun.tv xəbər verir ki, şokolad sevənlər üçün sevindirici xəbər var. Rusiyalı nutrisioloq Olqa Romaşina bildirib ki, düzgün seçilmiş şokolad hüceyrələrin qocalma prosesini ləngitməyə kömək edə bilər.
Mütəxəssisin sözlərinə görə, kakaonun tərkibində sağlamlıq üçün faydalı olan bir sıra bioloji aktiv maddələr mövcuddur. O qeyd edib ki, əsas təsiredici komponentlər flavanollar, teobromin və polifenollardır. Məhz bu birləşmələr hüceyrələrin vaxtından əvvəl qocalmasına səbəb olan prosesləri zəiflətməyə kömək edir və orqanizmin ümumi vəziyyətinə müsbət təsir göstərir.
Olqa Romaşina vurğulayıb ki, bu faydaları əldə etmək üçün istənilən şokolad uyğun deyil. Onun sözlərinə görə, ən çox faydalı maddə tərkibində kakao miqdarı 70 faiz və daha yüksək olan tünd şokoladda cəmləşib. Südlü və şəkər tərkibi yüksək olan şokoladlarda isə bu maddələrin miqdarı xeyli az olur.
Ekspert əlavə edib ki, tünd şokoladın faydalarından yararlanmaq üçün onu normada qəbul etmək vacibdir. Həddindən artıq şokolad istehlakı yüksək kalori və şəkər səbəbindən sağlamlıq üçün arzuolunmaz nəticələr yarada bilər.
Mütəxəssisin fikrincə, balanslı qidalanma və sağlam həyat tərzi ilə birlikdə keyfiyyətli tünd şokoladın rasiona daxil edilməsi orqanizmdə qocalma proseslərinin ləngiməsinə və ümumi sağlamlığın qorunmasına töhfə verə bilər.
Mənbə: mail.ru