Bugun.tv xəbər verir ki, ABŞ-ın dərman istehsalçısı Pfizer qeyri-seqmental vitiliqonun müalicəsi üçün hazırladığı ağızdan qəbul edilən Litfulo (ritlekitinib) preparatının III mərhələ klinik sınaqlarında müsbət nəticələr əldə etdiyini açıqlayıb.
Şirkətin məlumatına görə, TRANQUILLO və TRANQUILLO 2 adlı iki əsas klinik tədqiqatda preparat qəbul edən xəstələrdə 52 həftə ərzində həm üzdə, həm də bədənin digər hissələrində dəri piqmentasiyasının bərpası plasebo qrupuna nisbətən əhəmiyyətli dərəcədə yaxşı olub. Sınaqlarda preparatın həm aktiv, həm də stabil qeyri-seqmental vitiliqosu olan xəstələr üzərində effektivliyi qiymətləndirilib.
Pfizer bildirib ki, preparatın təhlükəsizlik göstəriciləri əvvəllər saç tökülməsinin ağır forması olan alopecia areata xəstələrinin müalicəsində müşahidə edilən nəticələrlə uyğun olub və yeni təhlükəsizlik riski qeydə alınmayıb.
Şirkət əldə olunan nəticələr əsasında Litfulonun vitiliqonun müalicəsi üçün təsdiqlənməsi məqsədilə yaxın vaxtlarda dünyanın müxtəlif ölkələrinin tənzimləyici qurumlarına müraciət edəcəyini açıqlayıb. Əgər preparat təsdiq olunarsa, bu, vitiliqo xəstələri üçün ilk sistemli ağızdan qəbul edilən müalicə variantlarından biri ola bilər.
Mənbə: Reuters