Bugun.tv xəbər verir ki, ABŞ Müdafiə Nazirliyi (Pentaqon) Lockheed Martin və Northrop Grumman şirkətləri ilə Patriot və THAAD hava hücumundan müdafiə sistemləri üçün tutucu raketlərin istehsal gücünün artırılmasına yönəlmiş ümumi dəyəri 3 milyard dollardan çox olan müqavilələr imzalayıb.
Pentaqonun məlumatına görə, çoxillik çərçivə sazişləri kritik raket komponentlərinin istehsal imkanlarını genişləndirəcək. Bunun nəticəsində gələcəkdə Patriot sistemləri üçün PAC-3 raketlərinin istehsal həcminin üç dəfə, THAAD sistemləri üçün isə dörd dəfə artırılması nəzərdə tutulur.
Northrop Grumman bildirib ki, müqavilələrin təxminən 2 milyard dolları PAC-3 raketləri üçün mühərriklərin və digər əsas komponentlərin istehsalına, 1 milyard dolları isə növbəti yeddi il ərzində THAAD sisteminin komponentlərinin istehsalının genişləndirilməsinə yönəldiləcək.
Xatırladaq ki, iyulun sonunda Pentaqon Lockheed Martin ilə Patriot raketlərinin istehsalı və tədarükü üzrə yeddi illik müqavilənin ümumi dəyərini 58,6 milyard dollara çatdırdığını açıqlamışdı.
Mənbə: TASS