Bugun.tv xəbər verir ki, qaynadılmış ətdən həddindən artıq istifadə həzm sisteminə əlavə yük yarada, böyrəklərin fəaliyyətini ağırlaşdıra və orqanizmdə müxtəlif narahatlıqlara səbəb ola bilər.
Gazeta.Ru-ya danışan cərrah, Dövlət Maarifləndirmə Universitetinin tibb fakültəsinin cərrahiyyə kafedrasının baş müəllimi Aleksandr Umanov bildirib ki, çox miqdarda ət, o cümlədən quş əti qəbul edildikdə yüksək zülal yükü yaranır. Onun sözlərinə görə, bu zaman həzm üçün daha çox ferment və öd ifrazına ehtiyac yaranır.
Həkim qeyd edib ki, bir dəfəyə çox ət yemək mədədə ağırlıq, qarında şişkinlik, ağrı, ürəkbulanma, qıcqırma və nəcis ifrazında pozuntulara səbəb ola bilər. Ətin tərkibində lif olmadığı üçün yalnız ət ağırlıqlı qidalanma bağırsaqların fəaliyyətinə də mənfi təsir göstərə bilər.
Umanovun sözlərinə görə, ət yaxşı çeynənmədikdə onun həzmi çətinləşir və bağırsaqlarda arzuolunmaz fermentasiya və çürümə prosesləri baş verə bilər. Həddindən artıq zülal qəbulu qaraciyər və böyrəklərin yükünü də artıra bilər.
Həkim gündəlik qidalanmada əti təxminən 150–200 qram miqdarında qəbul etməyi, onu tərəvəzlərlə birlikdə yeməyi və hər əsas qidalanmanın mərkəzinə çevirməməyi tövsiyə edib.
Mənbə: mail.ru