Bugun.tv xəbər verir ki, ABŞ-ın Oreqon Dövlət Universitetinin alimləri sosial şəbəkələrdən istifadənin tənhalıq və depressiya ilə əlaqəsini araşdırıblar.
Araşdırmada yaşı 30-70 arasında olan 1512 amerikalı iştirak edib. Nəticələr göstərib ki, real həyatda yaxınlarından emosional dəstək alan insanların tənhalıqla üzləşmə ehtimalı sosial şəbəkələr üzərindən dəstək alanlarla müqayisədə daha aşağı olub.
Tədqiqatçılar real həyatda demək olar ki, heç bir dəstək almayan insanlarda tənhalıq hissinin riskinin səkkiz dəfədən çox yüksək olduğunu müəyyənləşdiriblər. Sosial şəbəkələrdə alınan dəstəyin isə tənhalıqla əlaqəsi daha zəif olub və yekun təhlildə əsas əhəmiyyət daşıyan amil real həyatda göstərilən dəstək olub.
Digər araşdırmada isə yuxudan oyandıqdan sonra ilk 30 dəqiqə ərzində sosial şəbəkələrə daxil olmaqla depressiya əlamətləri arasında güclü əlaqə aşkarlanıb.
Alimlər vurğulayırlar ki, bu nəticələr sosial şəbəkələrə erkən baxmağın birbaşa depressiyaya səbəb olduğunu göstərmir. Bunun əksinə, depressiya əlamətləri olan insanların da səhər saatlarında sosial şəbəkələrdən daha çox istifadə etməsi mümkündür.
Tədqiqatçılar bildirirlər ki, sosial şəbəkələr mütləq şəkildə zərərli deyil. Lakin onlardan necə və hansı vaxtda istifadə edildiyinə daha diqqətlə yanaşmaq vacibdir.
Mənbə: mail.ru