Britaniyalı aktyor Robert Pattinson məşhur Ceyms Bond obrazını canlandıracaq yeni aktyor kimi seçilib. Bununla da uzun müddətdir davam edən 007 rolunun növbəti ifaçısı ilə bağlı müzakirələrə son qoyulub.
Bugun.tv xəbər verir ki, Amazon MGM Studios noyabrın 16-da Robert Pattinsonun növbəti Ceyms Bond filmində baş rolu canlandıracağını rəsmən açıqlayıb. Bununla aktyor Daniel Kreyqdən sonra məşhur britaniyalı kəşfiyyatçı obrazını canlandıracaq yeni ifaçı olacaq.
Filmin rejissoru “Dune” və “Arrival” ekran əsərləri ilə tanınan Denis Vilnöv olacaq. Ssenari üzərində isə “Peaky Blinders” serialının yaradıcısı Stiven Nayt çalışır. Filmin prodüserləri Emi Paskal və Devid Heymandır.
Yeni Bond filmi üçün hazırlıqlar başlayır
Robert Pattinson açıqlamasında Ceyms Bond obrazını canlandırmağın onun üçün böyük şərəf olduğunu bildirib. Aktyor bu rolu karyerasının ən mühüm hadisələrindən biri kimi qiymətləndirib.
Rejissor Denis Vilnöv də Pattinsonun seçilməsindən məmnunluğunu ifadə edərək onun obrazına fərqli ruh və yeni yanaşma gətirəcəyini vurğulayıb.
Pattinson “Twilight” film silsiləsindəki Edvard Kallen obrazı, “The Batman” filmindəki Betmen rolu və digər ekran əsərləri ilə geniş tamaşaçı auditoriyasına tanışdır.
Yeni filmin adı və nümayiş tarixi hələ açıqlanmayıb. Bu ekran əsəri Amazon MGM Studios-un Ceyms Bond franşizasının yaradıcı nəzarətini əldə etməsindən sonra hazırlanan ilk Bond filmi olacaq.
Mənbə: ApNews
