Bugun.tv xəbər verir ki, Amerika Birləşmiş Ştatları Dövlət Departamentində yüzlərlə diplomat və dövlət qulluqçusu işdən uzaqlaşdırılıb.
Məlumata görə, Donald Trump administrasiyasının qərarı ilə təxminən 250 xarici işlər əməkdaşının fəaliyyətinə qısa rəsmi elektron məktub vasitəsilə son verilib. Ötən ildən başlayan kadr ixtisarı prosesinin minlərlə dövlət məmuruna da təsir etdiyi bildirilir.
Keçmiş rəsmilər xüsusilə İran və Ukrayna böhranlarının davam etdiyi həssas dövrdə enerji və diplomatiya sahəsində ixtisaslaşmış bölmələrin bağlanmasının ABŞ xarici siyasəti üçün ciddi risk yaratdığını qeyd edirlər.
ABŞ Dövlət Departamenti isə həyata keçirilən dəyişikliklərin əsas məqsədinin bürokratik maneələri aradan qaldırmaq və daha çevik idarəetmə sistemi qurmaq olduğunu açıqlayıb.
Məlumata əsasən, mövcud administrasiya dövründə karyera diplomatlarının yüksəlmə imkanlarının azalması nəticəsində təxminən 2 min diplomat ya istefa verib, ya da təqaüdə çıxmağa məcbur olub.
Hazırda dünya üzrə ABŞ səfirliklərində 100-dən çox səfir vəzifəsinin boş qaldığı bildirilir.
Keçmiş səfirlər isə təcrübəli diplomatların uzaqlaşdırılmasının ölkənin xarici siyasətində uzunmüddətli problemlərə səbəb ola biləcəyini və institusional yaddaşın zəiflədiyini vurğulayıblar.
Qeyd olunur ki, Dövlət Departamentində illik fəaliyyət qiymətləndirmələrinə “idarəetmənin siyasətinə sədaqət” meyarının əlavə olunması əməkdaşlar üzərində təzyiqi daha da artırıb.
Mənbə: TrtHaber