Bugun.tv xəbər verir ki, siyasi ekspert Məhəmməd Əsədullazadə ABŞ və İran arasında Cenevrədə davam edən danışıqların müsbət nəticələr verə biləcəyini bildirib.
Ekspert sosial media hesabında paylaşdığı fikirlərdə qeyd edib ki, danışıqların iki mərhələdə aparılması nəzərdə tutulur. Onun sözlərinə görə, Pakistanın Baş nazirinin iştirakı ilə keçirilən görüşlərdə ABŞ-ı vitse-prezident Ceyms Devid Vens, İranı isə parlament sədri Məhəmməd Baqir Qalibaf və xarici işlər naziri Abbas Araqçi təmsil edir.
Məhəmməd Əsədullazadə hesab edir ki, tərəflər arasında aparılan müzakirələrdə müəyyən müsbət irəliləyişlərin əldə olunması istisna deyil. O bildirib ki, İranın Hörmüz boğazını bağlaması Tehranın diplomatik danışıqlar masasında üstün mövqe qazanmaq cəhdi kimi qiymətləndirilə bilər.
Ekspert həmçinin vurğulayıb ki, Livan cəbhəsində hazırda nisbi sakitlik müşahidə olunur və bu vəziyyət tərəflər arasında yeni danışıqların keçirilməsi üçün imkan yarada bilər.
Əsədullazadənin fikrincə, Cenevrədə aparılan danışıqlarda müsbət nəticələrin əldə olunması ehtimalı yüksək olaraq qalır.