ABŞ Federal Aviasiya Administrasiyası (FAA) yüzlərlə Boeing 737 MAX təyyarəsində sərnişin oturacaqlarının düzgün quraşdırılmaması ilə bağlı təhlükəsizlik xəbərdarlığı yayıb və məcburi texniki yoxlamaların aparılmasını təklif edib.
Qurumun açıqlamasına görə, ABŞ-da qeydiyyatda olan 453 Boeing 737 MAX təyyarəsində oturacaq konstruksiyalarının bəzilərinin relslərə düzgün bərkidilmədiyi ehtimal olunur. FAA xəbərdarlıq edir ki, problem aradan qaldırılmasa, fövqəladə eniş və ya güclü turbulentlik zamanı oturacaqlar yerindən çıxa, sərnişin və ekipaj üzvlərinin xəsarət almasına səbəb ola, həmçinin təxliyə zamanı keçidləri bağlayaraq insanların təyyarədən çıxmasını ləngidə bilər.
Məlumata görə, hər təyyarədə 69-a qədər oturacaq konstruksiyası yoxlanıla bilər. FAA-ya əsasən, yoxlama və zəruri düzəlişlərin hər oturacaq üçün təxminən bir saat çəkəcəyi və əlavə ehtiyat hissələrinin tələb olunmayacağı gözlənilir.
Boeing şirkəti bildirib ki, bu məsələ ilə bağlı 2025-ci ilin sonunda aviaşirkətlərə texniki göstəriş göndərilib və şirkət həmin tövsiyələrin FAA tərəfindən məcburi qaydaya çevrilməsini dəstəkləyir. Qərar hələlik yalnız ABŞ-da qeydiyyatdan keçmiş təyyarələri əhatə etsə də, beynəlxalq aviasiya tənzimləyicilərinin də oxşar addımlar ata biləcəyi bildirilir.
Mənbə: Reuters