Bugun.tv xəbər verir ki, Afrikanın iri mobil ödəniş şirkətlərindən biri olan Airtel Money London birjasında böyük ilkin səhm satışına hazırlaşır.
Financial Times yazır ki, şirkət ilkin səhmlər satışından ən azı 800 milyon dollar cəlb etməyi və şirkətin bazar dəyərini 8–9 milyard dollar aralığında formalaşdırmağı hədəfləyir.
Airtel Money Afrikanın müxtəlif ölkələrində mobil telefonlar vasitəsilə ödəniş və maliyyə xidmətləri göstərir. Şirkətin 56 milyondan çox müştərisi olduğu və ötən il 1,36 milyard dollar gəlir əldə etdiyi bildirilir.
Airtel Africa hazırda Airtel Money-də təxminən 78 faiz paya sahibdir. Şirkətin London birjasını seçməsi Britaniyanın son illərdə zəifləyən səhm bazarına iri şirkətlərin çıxarılması istiqamətində səyləri fonunda diqqət çəkir.
Financial Times qeyd edir ki, Airtel Money-nin planlaşdırılan səhm satışı 2026-cı ildə London bazarında ən iri ilkin səhmlər satışlarından biri ola bilər.
Mənbə: FinancialTimes