Bugun.tv xəbər verir ki, Avropa Komissiyası Avropa İttifaqının viza siyasətini sərtləşdirməyə hazırlaşır. Bu barədə Brüsseldəki diplomatik mənbə TASS agentliyinə məlumat verib.
Məlumata görə, Avropa Komissiyası payız aylarında Aİ üzv dövlətlərinə yeni təkliflər paketi təqdim etməyi planlaşdırır. Təkliflərdə ictimai təhlükəsizlik riskləri yaradan ölkələrin vətəndaşlarına viza verilməsindən imtina üçün əlavə meyarların müəyyənləşdirilməsi nəzərdə tutulur.
Mənbənin sözlərinə görə, yeni qaydalar ilk növbədə Rusiya, Belarus və İran vətəndaşlarına şamil edilə bilər. Bununla yanaşı, gələcəkdə bu siyahının genişləndirilməsi də istisna olunmur.
Bildirilir ki, təşəbbüsün məqsədi Aİ-nin daxili təhlükəsizliyini gücləndirmək və mümkün risklərin qarşısını almaqdır. Təkliflərin qəbul olunacağı təqdirdə üzv ölkələrə viza müraciətlərini qiymətləndirərkən daha geniş səlahiyyətlər veriləcək.
Hazırda Avropa Komissiyası tərəfindən məsələ ilə bağlı rəsmi sənəd təqdim edilməyib.
Mənbə: TASS