Bugun.tv xəbər verir ki, Avropa Birliyi Rusiyaya qarşı tətbiq edilən sanksiyaların müddətinin altı aydan bir ilə qədər artırılması məsələsini müzakirəyə çıxarmağa hazırlaşır.
Məlumata görə, bu barədə Politico Europe mənbələrə istinadən məlumat yayıb.
Nəşrin yazdığına görə, Avropa Birliyi liderləri iyun ayında Brüsseldə keçiriləcək toplantıda Rusiyaya qarşı sanksiyaların yenidən təsdiqlənmə müddətinin dəyişdirilməsi məsələsini müzakirə edəcəklər.
Hazırda Aİ-nin Rusiyaya qarşı sanksiyaları hər altı aydan bir yenilənir. Yeni təklif qəbul edilərsə, sanksiyaların uzadılması prosesi ildə bir dəfə həyata keçirilə bilər.
Xatırladaq ki, Avropa Birliyi Rusiyaya qarşı ilk sanksiyaları 2014-cü ilin yazında, Krımın Rusiya tərəfindən ilhaq edilməsindən sonra tətbiq edib. O vaxtdan etibarən məhdudiyyətlər mütəmadi şəkildə uzadılıb və genişləndirilib.
Hazırda Aİ Rusiyaya qarşı ümumilikdə 20 sanksiya paketi qəbul edib. Bu məhdudiyyətlər Rusiya iqtisadiyyatının müxtəlif sektorlarını əhatə edir və indiyədək tətbiq olunan ən genişmiqyaslı sanksiyalar hesab olunur.
Mənbə: TASS