Bugun.tv xəbər verir ki, Qrinviç Kral Rəsədxanası (Royal Observatory Greenwich) süni intellekt alətlərinin insan düşüncə qabiliyyətinə mənfi təsir göstərə biləcəyi ilə bağlı xəbərdarlıq edib.
Mütəxəssislər bildirirlər ki, suallara və mürəkkəb problemlərə saniyələr içində cavab verən süni intellekt sistemləri insanlarda araşdırma, analiz və düşünmə vərdişlərinin zəifləməsinə səbəb ola bilər.
Qurumun daxil olduğu muzey qrupunun direktoru Paddy Rodgers qeyd edib ki, hazır cavablara tam şəkildə bağlı olmaq insan zəkasını və innovasiya qabiliyyətini tədricən zəiflədə bilər.
Onun sözlərinə görə, bilik və elmin əsasını təşkil edən araşdırma aparmaq, nəticələri qiymətləndirmək və sual vermək kimi bacarıqlar yeni texnologiyalar fonunda arxa plana keçmək riski daşıyır.
Ekspertlər astronomiya tarixindən nümunələr gətirərək bildiriblər ki, keçmiş alimlərin “lazımsız” görünən əlavə araşdırmaları sonradan böyük elmi kəşflərin əsasını qoyub. Onların topladığı bəzi məlumatlar 150 il sonra belə dəniz naviqasiyası sistemlərinin yoxlanılmasında mühüm rol oynayıb.
Araşdırmada qeyd olunur ki, süni intellektin təqdim etdiyi sürətli və filtrdən keçmiş nəticələr insanları ilkin və etibarlı məlumat mənbələrindən uzaqlaşdıra bilər.
Bununla belə, mütəxəssislər süni intellektin elmi araşdırmalar və təhsil sahəsində faydalı tərəflərini də vurğulayırlar. Xüsusilə AlphaFold2 kimi texnologiyaların mühüm elmi nailiyyətlərə səbəb olduğu qeyd edilir.
Mənbə: Trt.haber