Bugun.tv xəbər verir ki, alimlər əsrlərdir paslanmadan qalan qədim dəmir konstruksiyaların dayanıqlığının sirrini müəyyən ediblər.
Araşdırma zamanı Hindistanın mərkəzi bölgəsində yaşayan Agaria icmasının nəsildən-nəslə ötürdüyü ənənəvi dəmir istehsalı üsulları öyrənilib. Məlum olub ki, qədim ustaların istifadə etdiyi texnologiya dəmirin səthində zamanla özünü qoruyan təbii müdafiə təbəqəsinin yaranmasına səbəb olur.
Tədqiqatçılar dəmir nümunələrinin üzərində hematit, kvars və kalsit minerallarından ibarət xüsusi qoruyucu qat aşkar ediblər. Bu təbəqə nəmin və oksigenin metal ilə təmasını məhdudlaşdıraraq paslanma prosesini əhəmiyyətli dərəcədə ləngidir.
Alimlər bildiriblər ki, bu xüsusiyyət təkcə filizin tərkibi ilə bağlı deyil. Ənənəvi sobaların quruluşu, istifadə olunan gil, isti döymə üsulu və metalın emal texnologiyası birlikdə bu qoruyucu təbəqənin formalaşmasına şərait yaradır.
Araşdırma əvvəlki nəzəriyyələri də təkzib edib. Əvvəllər qədim dəmirin paslanmamasının səbəbi fosfor elementi ilə əlaqələndirilsə də, son analizlərdə nümunələrdə fosfor izinə rast gəlinməyib.
Mütəxəssislər hesab edirlər ki, qədim istehsal texnologiyalarının öyrənilməsi gələcəkdə daha ekoloji və uzunömürlü metal istehsalı üçün yeni imkanlar yarada bilər.
Mənbə: Ensonhaber