Britaniya-İsveç mənşəli əczaçılıq şirkəti AstraZeneca 2026-cı ilin ikinci rübü üzrə maliyyə nəticələrini açıqlayıb. Şirkətin əsas mənfəəti analitiklərin proqnozlarını üstələyib və rəhbərlik 2026-cı il üzrə maliyyə proqnozunu qüvvədə saxlayıb.
Şirkətin məlumatına görə, xərçəng və nadir xəstəliklərin müalicəsində istifadə olunan preparatlara yüksək tələbat gəlirlərin artmasına əsas töhfəni verib. İkinci rübdə ümumi gəlir 5 faiz artaraq 15,38 milyard dollara çatıb, əsas mənfəət isə bir səhm üzrə 2,63 dollar təşkil edib ki, bu da bazar gözləntilərindən yüksək olub.
AstraZeneca son aylarda bəzi klinik sınaqlarda uğursuz nəticələr əldə etsə də, şirkət uzunmüddətli inkişaf strategiyasına inamını qoruduğunu bildirib. Baş icraçı direktor Paskal Sorio yaxın 18 ay ərzində 20-dən çox III faza klinik sınağın nəticələrinin açıqlanacağını və şirkətin 2030-cu ilədək illik gəliri 80 milyard dollara çatdırmaq hədəfindən imtina etmədiyini vurğulayıb.
Maliyyə hesabatının açıqlanmasından sonra AstraZeneca səhmləri birjalarda bahalaşıb.
Mənbə: Reuters