Azərbaycan hökuməti İranla sərhəddə yük avtomobillərinin hərəkətinə tətbiq edilən məhdudiyyəti aradan qaldırıb.
Bugun.tv xəbər verir ki, bu barədə Azərbaycan Respublikasının Nazirlər Kabineti məlumat yayıb. Bildirilib ki, qərara əsasən məhdudiyyət bu gün saat 10:00-dan etibarən ləğv olunub.
Xatırladaq ki, Naxçıvan Muxtar Respublikasına martın 5-də İran ərazisindən pilotsuz uçuş aparatları ilə hücum edildiyi bildirildikdən sonra Azərbaycan–İran sərhədində yük avtomobillərinin hərəkəti müvəqqəti olaraq dayandırılmışdı.
Məlumata görə, hücum zamanı pilotsuz uçuş aparatlarından biri Naxçıvandakı beynəlxalq hava limanı ərazisinə, digəri isə Şəkərabad kəndində yerləşən məktəb binasının yaxınlığına düşmüşdü. Hadisə nəticəsində hava limanı binasına ziyan dəyib, 4 mülki şəxs yaralanıb.
Hadisədən sonra İranın Bakıdakı səfiri Mücteba Dəmirçilu Azərbaycan Xarici İşlər Nazirliyinə çağırılaraq ona etiraz notası təqdim olunmuşdu.
İlham Əliyev hücumları “terror aktı” kimi qiymətləndirərək orduya cavab tədbirləri hazırlamaq barədə tapşırıq vermişdi. Daha sonra İran tərəfi hücumla əlaqələrinin olmadığını bildirib. Məsud Pezeşkian ilə İlham Əliyev arasında keçirilən telefon danışığında da məsələnin araşdırılacağı qeyd olunub.
Mənbə: Ensonhaber