Bugun.tv xəbər verir ki, Milli Məclisin deputatı Ceyhun Məmmədov dövlət ümumi təhsil müəssisələrində çalışan müəllimlərin geyimi ilə bağlı qanunvericiliyə təklif edilən dəyişiklikləri dəstəklədiyini bildirib. Deputat bu barədə sosial media hesabında paylaşım edib.
Ceyhun Məmmədov qeyd edib ki, qanun layihəsində müəllimlər üçün vahid məktəb formasının tətbiqi nəzərdə tutulmur. Onun sözlərinə görə, məqsəd müəllimlərin məktəbə gələrkən peşə etikasına və təhsil mühitinə uyğun geyim prinsiplərinin hüquqi əsasının yaradılmasıdır.
Deputat vurğulayıb ki, müəllim cəmiyyətdə ən nüfuzlu peşə sahiblərindən biridir və şagirdlər üçün yalnız biliyi ilə deyil, davranışı, nitqi və xarici görünüşü ilə də nümunə olmalıdır. O bildirib ki, söhbət insanların geyim seçiminə müdaxilə etməkdən yox, məktəbin özünəməxsus dəyərlərinə və təhsil mühitinin tələblərinə uyğun geyim mədəniyyətinin formalaşdırılmasından gedir.
Ceyhun Məmmədovun fikrincə, müəllimlər məktəbə həddindən artıq qısa, açıq-saçıq və ya təhsil mühitinə uyğun gəlməyən geyimdə gəlməməlidirlər. O hesab edir ki, təklif edilən dəyişiklik müəllimlərin fəaliyyətini məhdudlaşdırmaq məqsədi daşımır, əksinə, məktəblərdə peşəkar iş mühitinin, nizam-intizamın və təşkilati mədəniyyətin daha da gücləndirilməsinə xidmət edir.