Milli Məclisin deputatı Ceyhun Məmmədov sosial media hesabında İlham Əliyevin tapşırığı ilə İran xalqına göstərilən humanitar yardımı yüksək qiymətləndirib.
Deputat bildirib ki, bu təşəbbüs mürəkkəb və həssas dövrdə həyata keçirilən mühüm və düşünülmüş addımdır. Onun sözlərinə görə, müharibə və gərginlik şəraitində mülki əhalinin üzləşdiyi çətinliklərin azaldılması baxımından bu cür humanitar yardımlar xüsusi əhəmiyyət daşıyır.
C.Məmmədov vurğulayıb ki, humanitar yardım hər hansı siyasi mövqedən daha çox, insani dəyərlərin ifadəsidir. Çətin vəziyyətdə olan insanlara dəstək göstərmək həm beynəlxalq humanitar prinsiplərdən, həm də milli-mənəvi dəyərlərdən irəli gəlir.
Deputat qeyd edib ki, Azərbaycan bu addımı ilə regionda yalnız siyasi və iqtisadi deyil, həm də humanitar sahədə məsuliyyətli və etibarlı tərəfdaş olduğunu bir daha nümayiş etdirir. Bu cür təşəbbüslərin dövlətin sülhə, sabitliyə və insan həyatının qorunmasına verdiyi önəmin göstəricisi olduğu bildirilib.
Paylaşımda həmçinin qeyd olunub ki, göstərilən yardım iki xalq arasında mövcud olan tarixi, mədəni və insani bağların daha da möhkəmlənməsinə xidmət edir. Çətin günlərdə göstərilən dəstəyin qarşılıqlı etimadı artırdığı və gələcək əməkdaşlıq üçün möhkəm zəmin yaratdığı vurğulanıb.
Sonda deputat humanitar yardımların əsas məqsədinin insan həyatının, sağlamlığının və rifahının qorunması olduğunu qeyd edərək, Azərbaycanın bu prinsiplərə sadiq qalaraq regionda humanitar həmrəyliyin güclənməsinə töhfə verməyə davam etdiyini bildirib.