Bugun.tv xəbər verir ki, İsveçdə 2026-cı il futbol üzrə Dünya Kuboku matçlarını açıq havada izləməyə hazırlaşan azarkeşlər əlverişsiz hava şəraiti ilə üzləşə bilər. Ölkənin cənub bölgələri üçün güclü yağış, ildırım və şimşək çaxmaları ilə bağlı xəbərdarlıq edilib.
İsveçin Dövlət Meteorologiya və Hidrologiya İnstitutu (SMHI) və yerli meteoroloqlar bildiriblər ki, şənbə günü gözlənilən əlverişsiz hava şəraiti minlərlə azarkeşin fan-zonalarda və açıq məkanlarda oyunları izləməsinə mane ola bilər. Xüsusilə ölkənin cənub hissələrində leysan xarakterli yağışların və güclü ildırım aktivliyinin müşahidə olunacağı proqnozlaşdırılır.
İsveç yığmasının Tunisi 5:1 hesabı ilə məğlub etməsindən sonra ölkədə futbol ab-havası yüksəlib.
Niderlandla keçiriləcək qarşılaşma öncəsi paytaxt Stokholmdakı Olimpiya Stadionu ətrafında minlərlə azarkeşin toplaşması gözlənilir. Lakin şəhər rəhbərliyi ildırım təhlükəsi yaranacağı təqdirdə tədbirlərin dayandırılacağını və insanların təhlükəsiz yerlərə yönləndiriləcəyini açıqlayıb.
Rəsmilər bildirirlər ki, hava şəraiti ilə bağlı qərarlar son anda yenidən qiymətləndiriləcək. Buna baxmayaraq, azarkeşlərin əksəriyyətinin komandalarına dəstək verməkdən vaz keçməyəcəyi vurğulanır. İsveç millisi qrup mərhələsində son oyununu iyunun 26-da Yaponiya yığmasına qarşı keçirəcək.
Mənbə: Reuters