Bugun.tv xəbər verir ki, ABŞ, Kanada və Meksikanın birgə ev sahibliyi etdiyi 2026-cı il FIFA Dünya Kuboku rekord istilərin kölgəsində davam edir. Alimlər turnir zamanı müşahidə olunan ekstremal isti və yüksək rütubətin iqlim dəyişikliyi ilə əlaqəli olduğunu bildirirlər.
Reuters-in yaydığı məlumata görə, World Weather Attribution təşkilatının alimləri ABŞ və Kanadanın bir hissəsini əhatə edən güclü “istilik qübbəsi”nin (heat dome) təhlükəli hava şəraiti yaratdığını qeyd ediblər. Onların fikrincə, bu cür ekstremal istilər insan fəaliyyəti nəticəsində yaranan iqlim dəyişikliyi olmasaydı, demək olar ki, mümkün olmazdı.
Bildirilib ki, iyulun 4-də Filadelfiyada keçiriləcək Paraqvay – Fransa oyunu zamanı hiss olunan temperatur beynəlxalq futbolçular ittifaqı FIFPRO tərəfindən tövsiyə edilən təhlükəsiz həddi keçə bilər. Hava proqnozlarına əsasən, bəzi bölgələrdə hiss olunan temperatur 40–46 dərəcəyə (105–115°F) çatacaq.
Mütəxəssislər xəbərdarlıq edirlər ki, belə hava şəraiti həm futbolçular, həm də azarkeşlər üçün ciddi sağlamlıq riski yaradır. Bu səbəbdən turnirdə əlavə su fasilələri tətbiq olunur, lakin FIFPRO hesab edir ki, bəzi hallarda oyunların vaxtının dəyişdirilməsi və ya təxirə salınması da nəzərdən keçirilməlidir. Hazırda FIFA-nın yüksək temperatur səbəbindən oyunların məcburi təxirə salınmasını tələb edən qaydası yoxdur.
Alimlər bildirirlər ki, iqlim dəyişikliyi səbəbindən bu cür istilər gələcəkdə daha tez-tez müşahidə olunacaq və iri beynəlxalq idman yarışlarının təşkili zamanı hava şəraiti əsas risk amillərindən birinə çevriləcək.
Mənbə: Reuters