Son bir həftə ərzində kosmos və astronomiya sahəsində diqqətçəkən bir sıra mühüm hadisələr baş verib. Alimlər Süd Yolunun quruluşu ilə bağlı yeni məlumatlar əldə edib, Çin okeanların müşahidəsi üçün yeni peyk orbitə çıxarıb, Mars missiyaları üçün yeni təhlükə müəyyənləşdirilib və yaşayış üçün potensial uyğun hesab edilən ekzoplanet barədə araşdırmalar yenilənib.
Astronomlar Süd Yolunun xarici spiral qollarına qədər olan məsafəni daha dəqiq müəyyənləşdiriblər. XMM-Newton və Chandra kosmik teleskoplarının qeydə aldığı qamma-partlayışlarının rentgen “əks-sədası” vasitəsilə aparılan araşdırma nəticəsində Perseus qoluna qədər olan məsafə təsdiqlənib, digər iki xarici qolun isə əvvəlki hesablamalardan təxminən 10 faiz daha uzaqda yerləşdiyi müəyyən olunub.
Mütəxəssislər kosmik tullantıların sürətlə artmasının gələcək kosmik fəaliyyət üçün ciddi təhlükə yaratdığı barədə xəbərdarlıq ediblər. Hazırda Yer orbitində 15 minə yaxın peyk, 36 mindən çox iri tullantı parçası və milyonlarla kiçik fraqment mövcuddur. Böyük sürətlə hərəkət edən bu hissəciklərin toqquşması yeni dağıntılar yarada bilər. Problemin həlli üçün orbitdə tullantıların toplanması, peyklərin istifadədən sonra daha tez orbitdən çıxarılması və beynəlxalq qaydaların sərtləşdirilməsi təklif olunur.
Çin iyulun 2-də Tsyütsüan kosmodromundan “Çançjen-4B” raketi ilə “Haiyan-2E” okean müşahidə peykini uğurla orbitə göndərib. Peyk dalğaların hündürlüyünü, küləyin sürətini, suyun temperaturunu və Dünya okeanının səviyyəsindəki dəyişiklikləri izləyəcək. Toplanan məlumatlardan dəniz naviqasiyası, hava proqnozları və iqlim dəyişikliklərinin öyrənilməsi üçün istifadə olunacaq.
Astronomlar Yerə 25 işıq ili uzaqlıqda yerləşən GJ 3378b ekzoplanetinin xüsusiyyətlərini yenidən qiymətləndiriblər. Yeni hesablamalara əsasən, planetin kütləsi əvvəl düşünülən kimi Yerin beş qatı deyil, təxminən 2,3 qatı təşkil edir. Bu isə onun qayalı səthə və maye suyun mövcud ola biləcəyi mülayim atmosferə sahib olma ehtimalını artırır.
Alimlər Marsda toz fırtınalarının kosmik aparatların fəaliyyəti üçün yeni təhlükə yaratdığını da müəyyən ediblər. Araşdırmaya görə, güclü toz fırtınaları zamanı yaranan elektrostatik sahələr elektron avadanlıqlara zərər verə biləcək elektrik boşalmalarına səbəb ola bilər. Bu hadisələrin Mars atmosferinin kimyəvi tərkibinə də təsir göstərə biləcəyi bildirilir.
Mənbə: mail.ru