Terapevt və profpatoloq Svetlana Burnatskaya duş qəbul etmək üçün ən uyğun vaxtın axşam saatları olduğunu bildirib.
O, bu barədə Lenta.ru nəşrinə müsahibəsində danışıb.
Həkimin sözlərinə görə, “duşu nə vaxt qəbul etmək daha yaxşıdır?” sualına universal cavab yoxdur.
Səhər saatlarında qəbul edilən duş insanın oyanmasına, gümrahlaşmasına və günə hazırlaşmasına kömək edir. Axşam duşu isə gün ərzində yığılan tər və yorğunluğu aradan qaldırır, psixoloji olaraq istirahət rejiminə keçidi asanlaşdırır.
Burnatskaya hesab edir ki, gigiyena baxımından, xüsusilə böyük şəhərlərdə yaşayan insanlar üçün axşam duşu daha məqsədəuyğundur.
O, həmçinin ən optimal variant kimi axşam isti, gigiyenik duşu qısa səhər sərin duşu ilə birləşdirməyi tövsiyə edib.
Həkim əlavə edib ki, seçim zamanı fərdi xüsusiyyətlər də nəzərə alınmalıdır. Məsələn, yuxu problemi olanlara axşam rahatladıcı prosedurlar, səhər halsızlıq yaşayanlara isə tonuslandırıcı su prosedurları daha uyğundur.
Mənbə: mail.ru