Bugun.tv xəbər verir ki, rusiyalı həkim, dosent İrina Volgina baş ağrılarının səbəbini araşdırmadan davamlı ağrıkəsici qəbul etməyin ciddi fəsadlara yol aça biləcəyini bildirib.
Onun sözlərinə görə, tez-tez yaranan və adi ağrıkəsicilərlə keçməyən baş ağrıları miqren, hipertoniya və hətta insult riskinin əlaməti ola bilər. Həkim qeyd edib ki, yalnız simptomu aradan qaldırmağa çalışmaq beyin şişi, meningit və ya sinusit kimi təhlükəli xəstəliklərin vaxtında aşkarlanmasının qarşısını ala bilər.
İrina Volgina bildirib ki, ağrıkəsicilərin ay ərzində 10-15 gündən çox istifadəsi “rikoset baş ağrısı” adlanan vəziyyət yarada bilər. Bu halda dərmanların özü baş ağrısını tətikləməyə başlayır.
Mütəxəssis aşağıdakı hallarda dərhal həkimə müraciət etməyi tövsiyə edib:
- baş ağrısının yerinin dəyişməsi,
- ürəkbulanma və qusma,
- nitq pozuntusu,
- üz və ya ətraflarda keyimə hissi.
Həkim əlavə edib ki, gərginlik tipli baş ağrıları çox vaxt stress, uzun müddət oturaq vəziyyətdə işləmək və boyun əzələlərinin həddindən artıq gərilməsi ilə əlaqəli olur.
Mənbə: mail.ru